Reided 4

LIO MEN VEDON-LI KRIMAN?

Kriman su soliad vapaspadäda givom gespiki

<Viloböv dabegön oles benädi; kredob, das ob liföl nu völadob mödikumo, ka as deadan. Yels mödik in fanäböp pelifädöls edadeidons in ob lölöfiko biedäli, heti e mekädi nimälik. Elärnob ad suemön, kisi säkäd krima sinifon, ed esludob ad notodön atosi asä dilodi obik pö tuved ata.>

Vöds fäküköl at päpenons in Lamerikän fa kriman, kel sis timül et esevädikom valemiko as <letälenan in deadaleziöb>.

Nem omik binon: <Caryl Chessman>; päcödetom ad deadön demü mimodug vomas tel.

Laböl bäldoti yelas teldegvel, älifädom zao lafi lifa okik in gudükumamastitods e fanäböps. Stebedom cödetadeidi okik, kel, i dub mod nekredoviko skilälik, me kel jelodom oki, pezögon ya dönuamo.

Ün tim et älautom buki teifülik, kel - binöl lekoef lifa okik e leigüpiko kusad - binon balik in jenav krima. Buk at, äsä nonik votik, givon gespiki ad säk dolöl: Lio men vedon-li kriman?

<Fät kanon breikön meni,> atos binon leset balid de <Chessman>. E fät äbreikon omi. Äbreikon somafädo omi, das verato pädränom lü veg krima. Atos äreifon eli <Caryl Chessman>, e se vöds fäküköl omik füm miserabik süikon, das mifät somik kanon drefön nenmiseriko alani bevü obs.

E das i obs täno kanobsöv binön päridükäb, tifan, ed igo sasenan.

Sekü drefs et, <Caryl Chessman> lärnom ad hetön ko nämöf flamädöl lifi e menis.

Het binon fovo flen ä konsälan balik omik.

<Chessman> penom: <Krims valik obik äsüikons se het obik ta mifät, kel äploton de yun primik obik ta ob,> e kredoy omi, bi so te men ut kanon penön, kel binon so niliko lo dead, e kel nu logon oki nüdik it.

Lekoef omik brulükon oli, bluvükon oli e fulükon oli ko kelied mu dibätik kol els <Chessman> at e votiks, kels ädeidons, bi lif, gidöf e spel pideidons büiko in ons it.

I mens sevons somanis, e ba men somik kosädon in sogod lönik obsik, ab atosi pas osevobs, ven het onik ta mifät splodülon ko näm nosüköl ....

-2-

Ab els <Chessman> at ba no okanons notodön me vöds so sublimiks e nespaliks utosi, kelosi senälons, ad küpälükön me atos volanefe mifäti okas.

Ab kiüpo täno vegam se dag oprimon-li pro ons?

Ün tim ut, kü ol, kel reidol kedetis at, vilol atosi.

Ibä i süadi at dagetoy dub reid buka lejeikik ela <Chessman.>

Vio votiko ibo lif hipula at epasetikonöv-li, if om, pos tif balid okik sunädo pö fikuls okik pifanädomöv fa mens sofik ä suemäliks, kels igivonsöv ome dönu kodi dabina e kredi in om it?

Atos ibinonöv alo pro om dönu mögod lifa frutik, jafädik ä menadigädika.

Ed ivilolöv-li, ikanolöv-li, refudön ele <Chessman> at mögodi et, if ilabolöv pöti ad gevön ome i yufi olik?

Te utan, kel labon ladäli, kel binon düfikum ka ston kanonöv sagön nespaliko ad atos: nö!

Els <Chessman> da vol lölik, kels no kanons lautön, ab kels pefanons soaliko in leziöbs oksik e ko tikods biedälik oksik, ledesirons meni, kel kanon suemön e vilon yufön.

Begons mögodi. No refudolöd ones mögodi at, ab fägükolöd manis e vomis ad vedükön dönu päridanis lanöfik ad mens, kels stanons sauniko e vobiäliko zänodo in züäd suemöl!

<Chessman> begom ole atosi, ven penom in finod lekoefa okik:

<Suno neit kömon. Pro ob obinon neit, kel finikon neföro. Atos labon-li siämi anik?>

Ol binol utan, kel kanol givön gespiki ad atos!

Ekö traduts vödas anik nekösömik: Mimodug = kidnap; reifön = to overcome; soliad = threshhold; vapaspadäd = gas chamber.