Reided 8

NIMS KONÄDIK

In natäl mena dranäl dabinon, das on pö jenot alik e pö votikam alik, kelis küpon, sukon kodi atas, e no finükon suki, büä etuvon oni. Sosus etuvon pläni, kotenon, vio primöfik at bo binonöv.

Büröletans obsik, kels älecedons mistomi komipi de <Thor> ko gians, ed älogons in luror viena zigoli de <Odin>, äkotenons leigo me fomälods at, äsä obs ün atim me hüpotets füsüdik e kiemaviks obsiks. I äjenos suvo, das men äkolkömon yegis, kels äbinons pro on löliko nesevädiks.

Klülos, das i ästeifon ad dadilädön onis. Plü yegs at äbinon bisariks, e läs älönedons pö züäd kösömik onik, plü mögod ädabinon, das bo äpölonöv tefü rig e disein onsiks. De menäd lü menäd täno fomälods neverätik päloveükons, ko sek, das ädistikons aiplu de jenöf.

If lelogobs konädis difik, tän kolkömobs in ons suvo drakis, ko kels lesiörs mutoms duinön komipi vemik.

Drak komädon ya ün tims mu vöniks pö pöps Lindäna-Germänik; in miteodav Grikänik dabinäd at i komädon.

Heroedans ämutoms deiflapön drakis, e <Medeia> ädalabof magivavabi ko draks pebefimädöli.

Fom Germänik rigik jinon ebinön drak nenflitämik.

Pas ün zänodatimäd ävedos valemo kösömik ad magulön mostis at ko flitäms.

Din bal alo binon fümik, sevabo, das draks se tims vönik binons gianasneks atimik, kelis büröletans obsik ekolkömons suvo in Frikop, kö pütuns gianagretik lifons.

Ven nu in Yurop in kleuds nol imoiköl Grikänanas e Romänanas päsüsebon äsvo dönu, äblinädoy ya suno nimafomes nesevädik läükotis magälik valasotik. Vödemadil no löliko kleilik in penäd de <Plinius>, in kel spikom dö sneks labü flitäms äs uts flitamugas, jinon ekodön, das äprimoy ad magulön i draki ön mod somik.

Nog badikumo emifomoy magi basiliska, kela loged igo ya äsaidon ad deidön menis e nimis, ed ad sigükön bimis.

Fom rigik ebinon klülabiko snek.

Lautans anik se zänodatimäd ejäfükoms sevabo okis me el <Basiliscus Regulus>: snek Frikopik plödakösömiko venenöfik mö pied zao bal lunik, kel älabon su kap steni vietik e seädis kil. Mu luveratiko zeiloy is honavipäri (= <Cerastes cornutus>) in Nolüda-Frikop mödanaediko komädöli, kel labon sus log alik okik honili tipik, du elecedoy bo dili bigik len tipot muda honili kilid.

Ad leced at nog plu pasüadükobs dub jenöfot, das nim labon zänodo su kap stripi klilakölik.

Klülos, das snek venenöfik at, kel klänedon oki ini sab, fümiko ebinon plödakösömiko riskädik pro mens, kels te pejukons me sandals. Sekü tuükam magälik venenöfa onik fino de atos basilisk edavedon, kel pianiko evedon sümbol vala, kel äbinon dämabik.

Pöp äcedon, das neföro ämögos, das most somik äkanon edavedön ön mod natik. Ma sagäd äsüikon se nög fa higok mifomik pinögöl, e kel fovo pikuvon fa bufod: nim, kel i

pänaudon levemiko ün zänodatimäd. <Basiliskanögs> sonemik, kels binons müdiks e payümons len ods äsä kedül, binons ye no dins votik äsä mögs in län obsik komädöls linasnekas (<Tropidonotus natrix>), kels panögons buamo ini dönakums. Sneks at, äsä reto i sots votik, stebons no selediko in leceks, kelis sukons klüliko, bi us binos vamik.

Pö pöp edagetons dub atos repüti, das ävagiosugons tetis kunas. Lukred at leno tefon küpedotis natavik, ab licinon de büoced mu bäldik, das snek binon nim, kel pagebon buamo fa lanans pro visit taleda. Dü steb su taled neodons ye nulüdoti, ed as at ebo milig binon vemo pötik, bi at pacedon as koapastöf eflumöfiköl.

Pö pöps mödik, samo pö zigans, demü kod at ün neits, ün kels cedoy, das lanans zivegons, skal labü milig padoseidon foi tänads. Dub atos speloy ad kanön spetön yufi onsik, u ad büoneletön dämükami.

Tefü ledredod balhon nepluon nemödiko leigodü drak. Mödadilo pamagulon as dabinäd ad jevod sümöl, kel labon zänodo su flom honi lunik tipik spiralafomiko petördöl, me kel fägon ad dugimön taanis mögädik.

Ün zänodatimäd äsüadoy fümiko dö dabin ona, ibä samäds difik honas et pädalabons ga fa lampörs e regs, e päkipedons kälöfiko in divöps.

Nog ün yel: 1559 elans di <Venezia> älofoms suämi säkenas 30.000 pro samäd plödakösömiko gretik; ab lof pärefudon.

<Hons> at, kels labons semikna sio lunoti metas kil binons ye jokatuts kevöfik tutavalüta, narvala (<Monodon monoceros>, kel no binon seledik in Nolüdapovean.

Zao ün zänod tumyela büik äjinos, das dabin balhona öliföfikon äsvo dönu. Itüvoy sevabo ettimo len Spelakap däsinotis ini klifs pikratölis, pö kelos nims ad balhons sümiks äsüükons vemo küpäli.

Ün tim et i nolavan ebinom, kel älesagom stabü atos, das nendoto nims somik nog lifons is ud us, u das elifons bü brefüp. Ab no ibetikom, das in topäds et lantilopasots komädons, kelas hinims e jinims labons honis stedik zao mö met bal lunikis.

Sekü nol pülik pärspäkta bojemanas, de kels däsinots pemäniotöl älicinons, pö magul profülik jelodäms at no te ereafons sui od, ab i no ai sui top verätik. Pö vestig kuratikum äklülädos kluo, das däsinots at leno ätefons balhonis.

Se sams at klülädos sio, das pö magulots konädik nimas no jäfoy teiko me magäl nentütedik, ab me daced, das eprimoy rigiko de jenöf, e das dü gol timas te emifomoy magi.

So binos i plänovik, sekü kod kinik sams piküpöl ävotikons fino ad mageds, kels neföro ekanons dabinön.

If xamoy kuratiko dini, tän plöpos tio ai ad tuvön i pö mags mu pemifomöls pläni pro daved binädas patik at.