KOMIP E MÄTARÖN TA LUPS

fa Gustav Hermann Kletke

Kolunan se rufotäns äkonom: "Ven ätopikob in rufot, in fagot liölas Linglänik kildeg de lödöp obik, kolunatop ze gretik votik nonik ädabinon, e nilädan nilikün oba älödom in fagot liölas plu degas de ob. Soal at äpliton obi mu vemo; ab ven poso ün novul muls ebo mäls ipasetikons, nendas ilogob meni seimik, äprimob ad senälön soalöfi boso tu vemiko, ed äsludob ad visitön nilädani.

Äbinos neit koldülik ko munasviet kleilik; feifölo ägolob ve veg obik, ven süpiko ror dumik äbluvükon obi. Älölogob, len vatafiv lup ästanon, kel ädasleiton me krals japik funi kapreola pilefanöl. Sosus älogon obi, ästopedon pö lufid oka, klülabiko ad vätälön, va no ömökonöv de ob zibi benosmekik zuik. Nim äbinon gretik ä nämik, ed ob äbinob saido stupik ad tadunön oni. If ifövoböv takediko vegami obik, ven äprimon ad murön, tän luveratiko no idemonöv fovo obi.

Bold obik ämidugon obi ad jütön glöbi da skin onik. Ün timül jüta lup ädunon löpiobuni, e so änedrefob blöti, ed ätroivob te föfafuti ona. Äjutedon boatagolölo lü ob, e ror yamik oka sunädo päbegespikon fa lims votik lusoga okik. Töbo ifugob sui bim, kela letuigs äfomons foki, ed i fledülob güni obik, ven ya i lunims mu gretiks fol ästanons dis ob.

Äyamedons ed äläkons lipis oksik; muds fomas bo äfulikons no nemödo ko salif sekü ledesir lü ob asä loet benosmekik. Ädeibejütob bali trupa, ed äspelob, das mit ona ed ut kapreola ödetirädons küpäli kenimas ona de ob. Atos ye no äjenon, e voiko no äkanob negidetükön onis, ibä lup e kapreol äbinons mägiks, du ob älabob logoti pinädik ä beno pinul- üdöli, e zuo bim äfraketon dub vet obik so mimaliko, das äkanons cedön doniosturi sunik oba, ön spet ad seivön nätimiko obi asä dini pilonädöl. Soäsä tik äbinon, so äjenos; letuig, su kel äseadob deodo, ädäbrekon äsä rid, lekläravifiko ädofalob sui glun, ed älabob ebo nog timi, ad leadön falön güni ijütiköl, e ad tirön neifi se vead, ven lup gretikün ätatakon obi. In komip äreafob büiküno ad seadön sui bäk ona, ägleipob koapi ona me brads obik, e nu lüd e rol love od äprimons, du lups votik äjinons stebedön in lit muna takediko fini komipa. Fino lup äreifon obi dis ok, ed äcedob nu, das deadamadüp obik ökömon. Ägleipon me kluvs oka ini blöt obik, e me tuts oka ini jot detik obik, ed ämäkon obi somo, das atos äposbinükon retodis nekvänedovik. Val ebo ävedon boso dagik fo logs obik, ven lunim ad benofät oba süpiko ädageton tiketi votik, ävotükon tataki oka, älüvädon joti obik ed äprimon ad letirön klotis de koap obik. Atos äsavon obi, ibä ven ägleipon luhäti oba, ed äsenob snudi luimik onik len flom obik, ägleipob oni len gug, ed äprimob ad kötön ati go ziliko me neif oba. Älumudon nog balna ed ädosturon täno mufedölo ä rögölo sui glun.

Iperob bludi mödik, ab äsenälob too, das äplobob nog lölöfiko ta tataks lupas votik. Balidi ädofälob dub flap nämik ta nud onik me büt güna, keli dönu idasumob de glun. Älöükon fe oki nog balna, ab äbinon so sorditik e lejekik, das äkanob gleipön oni len pödafuts onik, svönön oni löpio, e jedön oni ta flenädan onik, kel nu kobü on ko ror dredabik äfugon; bofiks ämoikons in bimülem. Ab nu äsenob süpo fibi so vemiki, das ob labü vuns dub kold löliko istifiköls te töbiko ärivob ludomi obik, keli dü mul lölik bal no äfägob ad lüvön.

Siso evitob vilöfo lupis, ab ga ebelifob nog kolkömi telid ko ons.

Nifüp äbinon plödakösömiko koldik, e zuo nif nemödik ifalon, sodas ätuvob in züamöp obik sketamakuli gudikün. Suvo ätanob, posä isaunikob, sketis ruilik dis futs, ed ämojutob löpio ve flumed glimöl, sodas pebs obik äpebons vemikumo pö juit fulik muada manik at. Pö bal lespatas at äbelifob ventüri, keli betikob dönu ko ledred.

Ilüvob ebo domi bü prim lulita ad sketön löpio ve vegäd brefik ela "Kennebec" magifik, kel äbeiflumon in nil yana obik. Soar äbinon jönik ä litik. Fulamun älogon domio de top löpik oka, ed äjedon stralis oka sui firs frodik, kels äsimons joli; äbinos magivamagod veratik. Nat lölik ästadon in stil, ini kel semikna löfilon ad stadükön oki; vat, taled e lut äjinons stadön in takäd lölöfikün.

Ilöpiosketob ve flumed mö liöls Linglänik ze tels, ven äkömob sui top, kö bluk smalik änüflumon; änüvegob ini at ad vestigön zugi onik. Peins tumyelik, e tsugs kanadänik äbobotikons kobio sus on ed äfomons bobi laidagrünik, kel in klotem nifüpik änidülon ed äspagon. Val äbinon dagik dis bob at, ab äbinob yunik ä nendredik, e ven äniniologob ini fomäd at rufota laidüpik, lad obik äpebon nämöfiko sekü juit. Fredavokäd: "hurrah!" oba ätonon da fot, ed ädalilob leogi, kel ai dönu äpostonon, jüs val ivedon dönu seilik. Fe semikna neitaböd soalik ätiluröbon me flitäm oka kvärepi lunedik.

Kväreps: plins nämädik at fota, ästanons us, äsva nos äfägon ad dämükön onis, äsä tim. Äbetikob, vio suvo yagan lindiyanik bo iklänedom oki poi tuigs at, vio suvo sagit omik nilü bluk at bo ideidrefon stägi, e vio suvo vikodavokäd sovadik omik bo itonon-la is. Äküpedob lülis, ven äbeilu- flitons, ed ätaetob natemami ad dalilön luvokädi fagik onsik.

Süpo tonod ätonon, kel äjinon kömön se glad dis futs obik. Äprimölo laodiko ä dredabiko äfinikon ad ror baltonik lunadulöl; äpaelikob, büikumo lil oba neföro ililon toni somik; älecedob oni, pö magäl fäkädik

obik, bosi sustaledik, so nesagoviko sovadiko at ätonon in soal lölöfik at. Nu älielob knätärön tuigis len jol, äsä de steps nima; blud ägedranon ini kap oba ön dran so vemik, das älabob seni, äsva skin obik päfilädon; äfrodos obi pu, das ätefos dinis natäla taledik. Süen obik ägeikon ed äzilogob demü jelodameds. Mun äsvieton da maifod, da kel ikömob ini dag fota, ed äcedölo atosi jelodamedi gudikün, äjutedob äsä sagit lü top usik.

Fagot äsuämon töbo metis tum, e töbo böd äkanonöv pluön tefü vifot fuga däsperik oba. Ven ye äflekob logis oba äl jol, äkanob küpön yegis dofik tel, kels ärönons da donaplanem ko vifot, kel nog äpluon tefü ut oba. Dub vifot at e dub vaul brefüpik, keli semikna ävögons, ämemosevob, das ets äbinons samäds tel lupas gedik vemo dredabikas. Neai büikumo ikolköm- ob bali nimas at, ab sekü bepenam, keli igivoy obe, älabob klieni ne- mödik ad seivön onis. Sovad neteimovik e näm no feniköl onsiks, kels jinons binön patöf patik natäla onas, kodons, das binons riskäd dredüköl pro tävan alik, kel pasüpädom dub neit.

Bimüls, kels äsimons jolis, äjutons lekläravifiko bei ob, ven äföfiojutob pö fug oba. Tio irivob segolöpi bimabobota, nog sekuni bal äneodob, ed übinoböv tefädiko sefik, ven nims obi pöjutöls in top, kö jol äbinon geilikum, äpubons niliküno löpü ob. No älabob timi ad vätälön, äfleg- ob kapi oba donio, ed äjutob föfio. Lups äbunons donio, ab ipölakalkulons tefü vifot obik, ed äbunons poi ob, du lefanot fa ons pispetöl äslifom plödio sui plen flumeda. Klienäl ädugon obi sui veg lü dom obik. Nifaflogs leitik älöpiovirons de fers sketas obik, ed äbinob ya nemödiko föfik fo nims obi pöjutöls, ven ror sovadik onsik äsevükon obi, das ädabinons dönu nilo po ob. No ägüflekob obi, äsenälob ni kudi ni fredi, te tikod dö lom äsüikon doliko pö ob, e täno ägebob nämi lölik tikäla e koapa oba leteiko ad skeapön. Äbinob lölöfiko kösömik su glad. Deli ömik ilifädob su skets, ab neai itikob, das övedons föro med balik pro sav oba. Ünü minut lafik vaul nimas pöjutöl äsevükon obi, das ädabinons nilo po ob. Äkömons ai nilikumo, älilob stepis onsik su glad, e ya äkredob, das äkanob lilön natemami vemik onas. Tänden alik e muskul alik koapa obik lemu ätenidons.

Bims ve jol äjinons danüdön in lit nefümik, e brein obik ya äprimon ad vedön suidik. Pöjutayag at ävedon nesufovik, ton nimas äbinon lenaudodik. Ekö! muf nenvilik süpo ämodugon obi se lüod oba. Lups nilo po ob, kels no äkanons stopön u flekön okis, äslifädons, äfalons ed äslifons nog fagikumo ve vegäd ze gretik.

Linegs onsik älagons luniko se cavs bludaredik, tutems vietik onsik änidülons, blöts vielik dofik onsik pitegons me sköm, e ven äbeislifons nilo bei ob, logs onsik äspagons ed ävögons me ror sekü vut e lezun.

Süpiko tikod äsüikon pö ob ad gebädön jenoti fädik at ad skeapön de ons, sevabo ad votükön ai dönu lüodi, sosuvo ökömons tu niliko nilü ob; ibä fom futas onsik äneleton onis ad rönön su glad votiko äsä in lüod stedik.

Sunädo ägebädob disini at. Lups, sosus ästanons dönu su futs oksik, äflekons okis dönu ta ob. Ya dönu äbinons nilo po ob, ven äliunob bobi ed äleadob beigolön nimis obi pöjutölis. Me ror sovadik ägeons lekäfi obik, e lups äslifons dönu sui pödakoaps oksik; äbinos magod lölöfik nenyufa e vuta nennämädik. So ägaenob metis ti tumis pö flek alik. Nog telna u kilna ädönuob manövi at, e pö naed alik lups ävedons vutikums, ab i fenikums.

Pisavob. Ästadob nu visü dom, e yagadogs obik dub noid iküpäliköls äsüjutedons vutiko se ludoms okas. Lups ästöpons röni vutik vifik okas, ed äflekons okis pos vätäl brefüpik ad fugön. Äküpedob onis, jüs mageds dofik onsik änepubons po lubel nilik. Täno ädeükob sketis obik ed ägolob lü dom, ko senäls, kelis kanoy gudikumo fomälön, ka bepenön.