[Volapük.com]  Volapük.com Home
 
  

MEMOT GLUMIDIK

 

ma fätots tävana fa "A. L.", petradutöl fa "Johann Schmidt"

"Inakobs nilü el Menado : zif su tipot nolüdik nisula Selebeän" - tävan yunik konom, kel ekompenom su el Trident pö nafam zü tal.

Iloegob flitön sus melajol bödis vemo jönikis ömikis, ed ädesinob ad dagetön anis onas, bi älabob skili mu saidiki stüfa.

Balan länanas äsagom obe, das ötuvob fümiko in top fagotü hol zao bal äl sulüd ä vesüd, kö flumed smalik äseflumon ini mel, bödis sota e köla alikas.

Ün göd balidfovik äsäkob käptene, va ädalob gebön dü del lölik boti smalik nafa, ed ädälom obe atosi. Äbinon smalik, ab piblimon vemo plitüliko.

Del äjinon ye övedön vemo hitik, e kodü atos nek älöfilom ad dugädön obi. Ibegob ya nensekiko valikanes, pö sogam kelas älabob demädi bosik. Fino donamastan telid nafa obsik, kel igevom sunädo pö prim gespiki refudik ad beg obik, äkömom, ed äsäkom obe, va ituvob dugädani. Ämutob koefön ome, das atos no äbinon soik, e nu älofom oki ad nafön ko ob. Atos äjafon obe fredi gretik, bi ebo ko om ädunob buiküno lespati.

Äsumobs günis e neifis obas, älabükobs obis me yegs anik, kelis ma kred obsik ökanobs gebön, ed äbestepobs täno boti.

Maat brefik leitik pälöükon, sail pätovedon, ed äsailobs pö vien gudik ve jol zeilio.

Flumedi smalik obe pilüjonöli ätuvobs nentöbo, e posä ilöpionafobs ve vegäd semik ona, ämobob ad doseitön maati, bi sail bo ökanon jeikön e momofön bödis. Botis ilogons luveratiko ya suvo, ab ba no nog saili vietik. Klu maat pädoseiton, ed ägleipobs gubis.

Del äbinon vemo hitik, ab isevobs büo atosi, e no äplonobs.

Äbejütobs i bödis vemo jönikis anikis, ab uti, keli patiko äsukob, nog leno ilogob, sevabo : sot paradita. Jünu valemo ilogob pas bödis somik tel. Äbinons ze gretiks, ko koap labü gretot zaik pijuna, ab ko plüms magifikün, kelis kanoy fomälön. Koap äbinon sevabo kliliko skarlataredik, flitäms äbinons tio löliko blägiks, e göb äkanon, e demü köl e demü fom onik, te paleigodön lä reinabob.

Äprogedobs löpio ve flumed vemo nefiviko, nü ägubölo, tän äjoikölo föfio boti me bemül, keli älabobs lä obs.

Äbinos tio zedel, e sol ädoniojedon gluti oka ko giviäl verato nespälik, kela dili gretik äklemobsös mu vilöfiko!

Ad gubön boso ko näm e laidäl äbinos nemögik. Äbleibobs vegön mögiküno in jad, ed äkömobs somo fagikumo tio vifot snela. Jols pibeglofons me bims gianagretik, kels bevü ods nesäbruloviko pitanons dub voulaplans e bimülem valasotiks.

In tops difik fivs miklänöfiko logotöls ädezugons de flumed; pitegons tio löliko me ridem e bims bäldik ininiofalöl.

Flumed it go no äbinon dibik, ab lestab dis vat äbinon so müdik ä slämik, das suvo leno äkanobs rivön gluni solidik me bemül obsik. Vidot flumeda äsuämon neseimo plu ka lounis ze teldegis.

Fino älogob bödi, keli äsukob. Böds tel äseadons su jol visü obs boso fagikumo löpio ve flumed.

Ägleipob güni obik, äxamob filidakapsüli, ed äpladob güni sui kien, ad labön blümo oni, üf böds bo öflitonsöv sus obs. Leigüpü atos ästeifob me gubam ad müfön boti obsik nog nilikumo lü jol visoik.

Böds äseadons su tuig, kel ätenikon de bim küprädasümik bäldik tio sus vat. Ädredob te, das äplafükobs onis ed ömoflitons.

Dugädan obik ämobom ad go nafön lü jol votik ed us dis fotülem fagikumo löpio ve flumed. Disin äbinon gudik.

Ven ikömobs len jol visoik, fotülem lovelagöl äklänedon obis, ed äkanobs binön nenkudiks. Äkipob in nam blümo pro jutam telrüdedagüni, du flen obik älaimüfom nefiviko boti.

Pos minuts anik äfägob ad logön kleiliko bödis da maifod in fotülem, ed älüvokädob flene ad stopön. Ädunom atosi.

Böds ädabinons nog su plad ot, in lüod gudik pro jütam, te boso fagikumo, kas sio ivipoböv. Ä-… … … … … … … … … ädoseitob güni, ägleipob gubi, e suno ädabinobs in top verätik.

Jol äbinon vemo lövik, ed äloegob luflitön bödi pivunöl in fagot piedas zao deglulas jüä teldegas äl nined läna. Ämüfobs spiföfiko boti leni jol, ed äbunob sunädo sui län.

Töbo ikontagob gluni yebagik müdik, ven dredälavok laodik dugädana obik ästöpädon obi. Ägüükob obi sunädo, ed äloegob stanön omi funapaeliko äd äs söipabled dremöli in bot. Äbinos leigiko, äsva gug omik pifäiknibon, ibä ätöbidom klülabiko vaniko, ad dunön natemi e vögami. Bradi bal äkipom tenikölo, votik älagon logamoviko dremölo donio ve flan omik.

"Nämätü God! kis binon-li ?" älüvokädob ome.

"Kömö ! - kömö ! - ini bot !" äsagom hagölo.

"Ab kis binon-li ?" ädönuob mu vemo ijekölo dö logot funasümik oma.

Ätakedikom vüo suniko, ed älüvokädom obe :

"Bunolöd ini bot ! No stebolöd ! No logolöd detio u nedetio ! Kömolöd ! Kömolöd ! Lif obsik riskädon !"

Sunädo ätikob dö snek venenik seimik, ed ägeflekob kludo ün timül ot nen zog fovikum. Pas ven äbinob dönu in bot, ägülogob lü top, kö istanob, ab älogob nosi.

Ebo ävilob säkön flene utosi, kelos ijeikon omi, ven älüodükob fädo logis obik lü bim gianagretik sus ob. Vokäd jeka äsplodülon pö ob, ed, if zesüd gretikün no idabinonöv, idosturoböv fümiko sekü dredäl.

Su bim oni züo ivoulölo lönäk mostöfiko gretik älagon so, das kap vidik plenöfik oka ebo äseädon love tuig, su kel böds iseadons, e sus top, kö ob ibinob ; äbinon gretikün, keli föro ilogob, dö kel föro ililob, e logs koldälik ona änidons äs nobains in solalit.

Jü tim at no icedob mögiki, das snek äkanon binön so gretik.

Bim älabon diameti piedas plu kilas ä fümiko züoti piedas plu velas, e lönäk ivoulon bimi löliko lulna, du dil sneka mö pieds pu jöls de bim jü kap nog äbinon livik. Kap at ädabinon ebo sus obs, ed äsesteigon zuniko e desiriko linegi fokafomik oka.

Sosus äbinob in bot, ägleipob bemüli, ed ädejoikob boti, ab pö atos äreafon sui bimastamod in vat iseatöl, ed äbinobs fimiko in släm.

"Joikolöd ! Joikolöd ! Lif obas riskädon ! Zeilon obis !" flen ävokädon, pö atos äjonom lü kap mosta.

Äjoikob ed äjoikob me fäg e näm valiks, ab nensekiko. Bot no äfeamufon de top, ed äflekon oki muamo boso flanio.

"Binobs fimiks", äsagob.

Ün timül ot snek ägetiron kapi oka e lü flan votik bima.

No ästeifïlobs ad tuvedön utosi, kelosi ädesinon. Ätikobs dö nos, äsä dö mod, medü kel ökanobs livükön boti ed ökanobs moikön. Bot no ämufon do obs bofik ätöbidobs ko näms valik obas.

Kis äkanon-li binön kod atosa ? Släm teik nemögiko äfägon ad fimakipön so obis, e ga äküpobs leno bosi votik, kas ästadobs in släm.

Äbinos stad ad vedükön eki vutalienitiki. Us most naudodik, kel ko giananäm oka äkanonöv troivülön obis äsä vumis, älagon so nilo, das äkanon fasiliko rivön obis, ed obs äbinobs fimiks.

Bot nog ai no ämufon. If äsebunobsöv se on, täno go nendoto ädrefidobsöv deadi, ibä vat no älabon diboti louna plu lafika, e dis on släm müdik nen glun solidik ädabinon, in kel ämutobsöv nesavoviko päridikön. Me bemül obsik lunotü pieds degtel no äkanobs rivön gluni.

O God obik ! timüls kion ets äbinons !

Koap mostöfik gianasneka älunidilon me köls äcenöl mil, bi ämufon in strals tio penditiko sola, e kap vidik plenöfik äsüikon de flan votik küpräda dönu verätiko susi obs.

Isteigob bemüli ini släm, ed äjoikob, ed äjoikob, ed äjoikob, ed ätenidükob lemu muskulis valik oba, jüs no plu äkanobs dotön, das no äfägob ad dunön plu bosi. Dugädan obik leigo äfenükom oki me gub.

Jol äbinon tu fagik, adas äkanobsöv rivön oni medü bun, e nilo i bim nonik ädabinon, äsä ut, su kel nog ai snek ädabinon.

Süpo flen obik äfalom sui bäk oka - masat dofik äjuton lekläravifo ve ob, e täno logs oba äfärmükons okis nenviliko.

Luvokäd dredabik flena obik äkodon, das älöikob süpiko, ed ämaifükob dönu logis.

Ekö ! äseatom us su bäk oka, e kap mosta ädabinon ebo su blöt omik.

Utosi, kelosi ün timül et äsenälob, no fägob ad bepenön. No äbinos dol koapik, ab datom levemikün fulü lenaud e lejek, keli lan menik nog äfägon ad sufidön, nes päridikön.

Snek ipladon kapi oka usio, e notod onik no kanon pabepenön gudikumo, ka äs yub gretikün milananas valik. Si ! notodi kap vidik plenöfik at älabon, notodi, keli ön stip nonik vipob ad logön nog balna, igo if kanoböv sädrefidön deadami me atos.

Du kap äseaton so, logs smalik flamülöl äkanons logön ini logod viktima. Koapi most älivükon pö atos pianiko de bim, ed ätiron oni lü ok ad züvoulön lefanäbi.

Ed is mutob verätükön cedi pölik, kel dareigon valöpo, kö sneks dabinons, kel komädon in julabuks, igo in lebuks natavik, e kel nog ai pafümükon fa tävans, das lönäk, boins e sneks atsotik votik läkons lefanoti okas bü slugam, e somo kövädons oni me salif u masat slifülabik ad fasilükön slugami. Atos leno binon soik. Snek no dunon mödikumosi, ka nim votik alik.

Jenöfo jenos so : snek slugon fanoti oka, äsä nims valik, kels nüslugons oni löliko. Nimis smalik nüslugons sunädo, igo nes viodön, nes däpedön onis. If snek gretik ye efaemon lunüpo, e tuvon nimi, kel labon züoti gretikum, ka uti koapa lönik oka, täno muton bitön votiko. Sevon, das muton deidön oni büiko, ed atosi dunön ön mod ot, ön kel dunon osi, ven komipon no sotakompenan oka : medü deiped. If fanot pedeipedon, täno primon ad nüslugön oni. Muton vemiko töbidön pö atos ; glans in mud onik patustigedons, e skretons sasvelikamio skretoti okas, soäsä log drenon, ven padolon. Sekü atos klüliko dil fanota, kel binon in mud, pakövädon me salif.

Ömna lönäk gretik ädoseaton su top ot dü tim lunik vigas tel ko stäg u nim gretik votik, kela dil plu lafik penüslugon.

Snek labon soti ot salifaglanas, kelis nims votik labons, no mödikumis e no nemödikumis. If suvo tuvoy nimi lafo fa snek penüslugöli, kel petegon dub salif, täno kod atosa binon, das ba etislugon oni dü vig bal, e das salifaglans emutons skretön dü tim ot. Salifam binon sek tustigeda glanas, no jenon demü mök desinik ä natöfik nulüdota.

Dü timül, posä ilogob stadi dredabik flena obik, lölöfiko no äfägob ad jäfön u tikön, ab hag ti piteiföl neläbana fo ob ägegivon obe süeni, ed ästigädon obi ad dunön.

"Savolöd obi !" äsevögom, e neai ün lif oba vöds votik so ästigädons obi, äsä ats. No äfäküköns te ladäli obik, ämoükons de ob sunädo, äsä dub milag, löliko dredi, e viläl lölik e muskul alik äletöbidons ad dun.

Rüded bal güna obik nog pifledülon nämöfiko me glöbils. Äsumob güni, ed ätenidükob fögüli ona, ibä isludob fümäliko ad riskön vali.

Ästepob föfio mö step bal ed äkienob täno. Flan bal snekakapa piflekon äl ob. Äkipob rüdedafinoti güna nilü on, äzeilob dili vidikün ona kuratiko po ä dis log ed - äjütükob.

Äloegob löpiomufön masati blägik ut, kel ya balna ijeikon obi, ed ün timül fovik flap e cep äsökons, kels äbinons naudodiko pro lilam.

Koap sneka ivoulon fimiko zü bim, ab kap ko diled piedas degtel jüä degfolas särviga e koapa oka äpendülon ed äbaton mo e ge sui glun, ini bimülem ed ini tuigem bima.

Dü sekuns anik ädredob igo, das mos tat pö atos ödäflapon boti obsik, ab suno ädasevob, das riskäd at no binon gretik.

Flen älöükom oki, ab ad spikön no äfägom sunädo, e nog läs ad vobön. Ivedom go fibik e go fenik : ledredod riskäda, keli isufom, idafäkükon tu vemiko omi.

Äsüadükob obi, das no piviodom koapiko, täno no äsumob dönu bemüli, ed ästeifülob nogna ad müfön boti de top at. Atna ye älogob i utosi, kelos sio bo äkanon binön neletian, e suno äsevob, das bot iknibon oki ini vul fokafomik. Äbinos mögik ad moükön oni ko töbid anik, e nu bot ämufon.

Äsäkob kompenane obik, va öblibobs is ed öloegobs deadön sneki.

"Godö ! nö !" ägespikom fibiko. "Genafobsös vifiküno ! Senob vemo misauniko."

Klüliko no plu äzogob, ed ägubob donio ve flumed. Plödo älöükob maati, ed ätovedob saili. Ün soar ärivobs eli "Menado".

Ün del sököl länans anik ädevegoms lü top jenota mifätik. Ätuvoms sneki deadik ed äblinoms mosti i lü el "Menado". Us skin pädetiron e pästüfon. Komulan guvera Lindäna Nedänik älofom suämi vemo gretiki tä on, ed äselobs ome oni.

Liedo flen obik jinom leno estaudön löliko de dafäkükam, keli esufom. Nevasit lölik omik binon tufäkik, ed if seatom in slip seimna su bäk oka, täno foviko drim gedugon omi lü timül jeikik et, kü kap ledredodik gianasneka äseaton su blöt oma, jüs dremölo ed in suet koldik banölo galikom.

FIN